حوزہ نیوز ایجنسی کی رپورٹ کے مطابق، حجۃ الاسلام علی اصغر عرفانی نے صوبہ قزوین کی اربعین کمیٹی کے اجلاس میں حدیث نبوی " حُسَیْنٌ مِنِّی وَ أَنَا مِنْ حُسَیْنٍ " کو سرنامہ سخن قرار دیتے ہوئے کہا: اس حدیث کے سلسلے میں بعض نے یہ کہا ہے کہ چوں کہ امام حسین (ع) نے اسلام کو زندہ رکھا ہے اس لئے امام حسین (ع) کے بارے میں رسول اللہ (ص) نے یہ کہا ہے کہ حسین (ع) مجھ سے ہے اور میں حسین (ع) سے ہوں، لیکن اگر پیغمبر اکرم (ص) نے اسی وجہ سے یہ ارشاد فرمایاہے تو ماننا پڑے گا کہ یہی تعبیر امام حسن (ع) کے بارے میں بھی ہونے چاہئے کہ حسن (ع) مجھ سے ہے اور میں حسن (ع) سے ہوں۔
انہوں نے سورہ آل عمران کی آیت نمبر 61 (آیہ مباہلہ) کا حوالہ دیتے ہوئے کہا: " حُسَیْنٌ مِنِّی وَ أَنَا مِنْ حُسَیْنٍ " کی اصل مباہلہ ہے اور آیہ مباہلہ ہم پر واضح کرتی ہے کہ ان عظیم ہستیوں کی حقیقت ایک ہے اور "کُلُّهُم من نور واحِد "سب ایک نور سے ہیں۔
صوبہ قزوین میں حوزہ علمیہ کی کونسل کے سیکرٹری نے کہا: امام حسین (ع) کی تحریک پیغمبر اکرم (ص) کی تحریک سے شروع ہوئی اور آپؐ کی تحریک سے ملتی جلتی تھی، امام حسین (ع) بھی اسلام کی حقانیت کا دفاع کرنے اور عاشورہ کے دن رسالت محمدی کو بچانے کے لئے اپنے اہل خانہ کے ساتھ نکل پڑے۔
انہوں نے مزید کہا: جس طرح رسول خدا (ص)کی مکہ سے مدینہ کی جانب ہجرت ہوئی اور وہ ہجرت مسلمانوں کے حالات میں تبدیلی کا باعث بنی اورایک نئی تاریخ کا آغاز ہوا، اسی طرح امام حسین (ع) کی ہجرت نے بھی پیغمبر اسلام (ص)کے دین کے احیاء میں موثر بنی اور اس لیے دونوں ہجرتیں دین کی خاطر اور مشن کی بقا کے لیے تھیں۔
حجۃ الاسلام عرفانی نے یہ بیان کرتے ہوئے کہ اربعین امام حسین علیہ السلام کے عظیم اجتماع کی عکاسی الفاظ میں نہیں ہو سکتی ، کہا: اربعین حسینی مختلف مذاہب اور مسالک کی موجودگی کا مرکز اور ظلم کے خلاف جدوجہد اور مظلوموں اور حق کے دفاع کے پیغام کا نام ہے ۔
انہوں نے اس بات پر تاکید کرتے ہوئے کہ اربعین امام حسین علیہ السلام میں دنیا بھر سے امت اسلامیہ کے لاکھوں اور کروڑوں افراد کی موجودگی بین الاقوامی سطح پر وسیع عکاسی کرے گی، کہا: اربعین حسینی میں عوام کے مختلف طبقوں کی پرجوش موجودگی اور ہمہ جہت شرکت شیعہ اور دنیا کی اہل بیت(ع) سے عقیدت اور محبت کے حقیقی چہرے کو ظاہر کرتی ہے۔
حجۃ الاسلام عرفانی نے کہا: آج ہم اس بات کا مشاہدہ کر رہے ہیں کہ دشمن نے اس عظیم اجتماع اور اربعین مارچ سے دنیا کی توجہات اور ذہنوں کو ہٹانے کے لیے اپنی تمام تر کوششیں اربعین پر مرکوز کر رکھی ہیں اور اسی وجہ سے وہ اربعین میں موجود کروڑوں لوگوں کی موجودگی کو دنیا کے سامنے نہیں دکھانا چاہتے۔
قزوین مدرسہ کے پروفیسر نے اشارہ کیا: طلباء کو مختلف تبلیغی اور ثقافتی پروگرام پیش کرتے ہوئے حسینی کے اربعین کاروانوں اور پیدل سفر میں زیادہ سے زیادہ شرکت کرنی چاہیے۔
